Lyrics composed by John Henderson on the 5th of January, 2010,
to Ernest R. Ball's 1916 music for the WW1 song,
'Good Bye, Good Luck, God Bless You'.

Oan hich Abbey Crag quait-steed baul wytin men,
Wi Wallace at thur heid;
Thase kilted chiels fae hull an glen
Wid mak the Forth rin reed;
Fur auld Scotia's weal an wi targe an wi steel
They'd brak prood Edward's chine,
An Stirling's Rock fae Inglishe yoke
Wid win its freedom syne. ....

Fae Stirling's Rock, a ryped Rock,
The battle fierce wis seen;
At Stirling Brig o' widden rig,
The River Forth abeen;
The brig it be'in ow're narra,
The Inglishe horse gat stack,
An ain by ain wur slaachter'd
By claymores' jab an hack !

The waater smucht ran bleed-reed
Wi hagger'd an the deid;
Fae castell wa the watchers saw,
An seen tyeuk aff at speed;
They heidit fur the border
As fest as they cud gang,
Fyle canny Scots delichted,
Sang lood the hale nicht lang.


Glossary:
hich = high quait = quiet steed = stood baul = bold
heid = head chiels - people hull = hill reed = red
weal = welfare targe = shield brak = brake prood = proud
chine = chain ryped = stolen widden = wooden rig = make-up
abeen = above narra = narrow stack = stuck slaachter'd = slaughtered
waater = water smucht = choked bleed = blood hagger'd = wounded
deid = dead castell = castle tyeuk = took heidit = headed
fest = fast cud = could gang = go
fyle = while canny = prudent delicht = delight lood = loud
hale = whole nicht = night lang = long