|
Lyrics composed by
John Henderson on the 25th of April, 2009,
to Walter Smith's 1917 music for the song, 'Dreamy Moon'.
In the gloamin, we wannert slaa
Throw oor strath's widlans faar lang shaddas faa;
Nae soonds wur hard fyle-we treidit fair quait,
Seekin "The Nook", an its "Jos' Sate".
Ooner the sindoon neist ooner the mune,
There we blether'd, there we fuspered;
Huggin an kissin till aa licht hid geen;
Starnies bricht in oor een.
Throw the sma oors time unkent fleed
In oor ain bower thit Ma Nature'd gied;
Till soonds cam clair frae the birdies abeen,
Kennin the sin wis comin seen.
Ooner yon brenches deep in-by the wid,
Whaur we'd blethered, whaur we'd fuspered;
Dozed-aff thegither syne douce oan oor lane;
Wi nae thochts o hame.
The dawnin day sherply a-wauken'd me,
I pirl'd ma lassie an she wauken'd tee;
Wi scries frichtsome she stairted tae greet
"Mam wull wint ken the rise an reet!"
Frae oot yon bower sae waarm in the wid,
(Whaur we'd blethered, whaur we'd fuspered,
Dozed-aff thegither syne douce oan oor lane)
Noo we scurried back hame.
We wur licky fan winnin hame;
The blins wur drawn oan her Mam's windae pane;
She scooted in-by wi nae muckle ado;
Fyle I thocht, "Losh! Fit wyes tae woo!" |
