|
Lyrics composed by
John Henderson on the 13th June, 2008
to Percy Wenrich's music for 'Sweet Cider Time When You Were
Mine'.
Introduction
Ah'm mynded o the kirkton braw thit Ah growd'd up in,
Schuled an kirked up tap its scaar;
Ah hear aince mair ma faither's vyce, fyles Ah wis lernin,
Saff in-by frae winter's haar;
Ah dit ma een an wanner, tae see the days back yonner,
An fess mair mem'ries nar ...
O the saans ... whaur they catch'd the reidfish
Ilk nicht till skreek o day;
Engeens huff-puffin, frae oot o the station,
Fairmwirkers oot gaitherin hay.
Oan the scaar frae the auld kirk steeple,
The oorly chimes wid soon,
An ivver in simmer, ilk man wi his kimmer
Oot waakin aa the roddies roon.
St Cyrus Ah'll aye mynd ye e'en noo ye're ow'r biggit
Wi mair bidin in yer airms;
Ah hear aye yit the waater's skirp as tides rowe slaa-in
Tae the joy o paiddlin bairns;
Wi ma sherp een Ah'm smilin, e'en noo it's a beguilin, braw
kirkton fu o chairms.
Och the saans ... whaur they catch'd the reidfish
Ilk nicht till skreek o day;
Engeens huff-puffin, frae oot o the station
Fairmwirkers oot gaitherin hay.
Oan the scaar, frae the auld kirk steeple,
The oorly chimes wid soon,
An ivver in simmer ilk man wi his kimmer
Oot waakin aa the roddies roon. |
