|
Lyrics composed by
John Henderson on 27th March, 2008,
to the old fair-ground tune, 'Calliope Stars".
Ae day fan his sillar ran oot,
Auld Jock Jack wonner'd fit shid be roupit;
He cwid sell his coos an his bul,
Or his shaltie an cairt tae boot.
"Och life's a fair scunner, he mained,
Nae yin tents gin fowks the liks o' me are trachled;
Bit there'll come the day thit they'll feel the pinch an aa,
An fit it's lik tae be wi age an poortith shackled."
Sae aff tae the mairket he gaed
Wi' teem cairt an his shaltie fur roupin;
The laird micht jist coff baith o them
Fur tae cairry his braw faavour'd maid.
"Ay, life's a fair scunner, he girned,
Nae yin tents gin fowks the liks o' me are trachled;
Bit there'll come the day thit they'll feel the pinch an aa,
An fit it's lik tae be wi age an poortith shackled."
An syne fan the haimmer banged doon,
Twis the laird fa hid baetin aa ithers;
Tho' Jock pooched echt poonds he wis dool
As he wauk'd hame wi'oot leukin roon.
"Ay, life's a fair scunner, he frooned,
Nae yin tents gin fowks the liks o' me are trachled;
Bit there'll come the day thit they'll feel the pinch an aa,
An fit it's lik tae be wi age an poortith shackled."
It teuk him a whilie oan fit
Tae win back tae his cottage an feedle,
Fan a sicht fur sair een steed there prood,
Faar his shaltie an cairt hid been pit.
"Losh, life's fu surpreeses," he lauched,
As he keeked at the note oan his cairt stacken,
An saw mony freens'd bocht them back fae the laird,
Nae likin auld Jock Jack wi age an poortith braken. |
