Sittin spinnin, sittin spinnin
A' the lea-lang day,
Hearin the bit burnie rinnin,
And the bairns at play.
I'm sweir to get my leg let loose,
To do a turn about the hoose ;
Oh, amna I a waefu wife
To spin awa my thried o life ?
Spinnin, spinnin, ever spinnin,
Never endin, aye beginnin ;
Hard at wark wi hand and fuit,
Oh, the weary spinnin o't.
Sittin spinnin, sittin spinnin,
Vow but I am thrang,
My wee pickle siller winnin,
Croonin some auld sang.
Leese me o my spinnin-wheel,
Gie's us a' oor milk and meal ;
Weet or dry, or het or cauld,
I maun spin till I grow auld.
Spinnin, spinnin, ever spinnin,
Never endin, aye beginnin,
Hard at wark wi hand and fuit
At the weary spinnin o't.
Sittin spinnin, sittin spinnin,
Sic a wear and tear,
Taps o tow for wabs o linen,
Till my heid is sair.
Mony a wiselike wab I've spun,
Spried and sortit i the sun ;
Puirtith cauld is ill to bear ;
Mony bairns bring mickle care.
Spinnin, spinnin, ever spinnin,
Never endin, aye beginnin,
Hard at wark wi hand and fuit,
Oh, the weary spinnin o't !
