Search just our sites by using our customised search engine

Unique Cottages | Electric Scotland's Classified Directory

Click here to get a Printer Friendly PageSmiley

The Singin' Tattie-Bogle 
Anon

Click here to listen to this in Real Audio read by Peter D Wright

Alane upon the field she stood,
The tattie-bogle, tall an' prood.
But certie, she wis smairt an' braw,
A bonnie lass, tho' made o' straw.
 
Her gowden hair wis made o' oo.
Her dentie goon when it wis new
Langsyne, hid been the guidwife's best.
Sae trigly wis the bogle drest!
 
The beasts they cam' frae a' the airts.
(The tod ran tours frae furrin' pairts.)
They cam' by day, they cam' by nicht,
To see a maist byordnar sicht.
 
An' craws an sparras by the score,
A wale o' burds, mair nor afore.
The fermer roared an' raged aboot.
'A'll cast yon tattie-bogle oot!'
 
Pair tattie-bogle, she wis wae.
'Eh!' said the houlet, 'Whits a dae?'
He flew doon frae the elder tree.
'Noo, dry yer e'en an' herk tae me.
 
'See, lassie, tak ma guid advice.
There is nae yiss ye bein' nice.
Can ye nae glower an' skreich an' a'
Tae sen' thae cooardie burds awa'?'
 
The bogle grat nae mair: instead
'A'm much obleeged tae ye,' she said
'Ma voice is lood - jist like the craik!'
'Then sing,' he said, ' for ony sake!'
 
It chilled the verra bluid tae hear
The bogle's sang : frae far an' near
The burds rose up, a' frichtit sair
An' nivver cam back ony mair.
 
Sae should ye pass at skreich o' day
Alang the road frae Auchenblae,
An' hear a strange uncanny soun,
That scares the burds for miles aroon,
 
A soon like pincils on a sclate,
Be on yer way an' dinna wait.
Ye can be shair as onything
Ye've heard the tattie-bogle sing.  

Return to Poetry/Quotes/Stories


 


This comment system requires you to be logged in through either a Disqus account or an account you already have with Google, Twitter, Facebook or Yahoo. In the event you don't have an account with any of these companies then you can create an account with Disqus. All comments are moderated so they won't display until the moderator has approved your comment.

comments powered by Disqus

Quantcast