Is Scotland Aiberdeen an twaal mile roon?
Scotland is mair nor that - a hantle mair.
It's muckle hills, their riggins roch an bare,
Lang-storied cities, mony a burgh toon,
Steen castles at were eence the nation's croon.
Seas tae the wast, wi islands here or there,
Rivers, wids, fairms, clean in the caller air,
Mines, harbours, airports - croodin sicht an soon.
But aye there's mair. There's his wirsels, the
Scots:
Heilan an Lowlan, here an hyne ootbye.
In aa the warl we've aye been seekin space
To bigg wir hooses, howk wir parks an plots.
Scotland's a thocht, a state o mind. Aawye
Scotland's far we are. Scotland's ony place.
