Features - Scots Language

Reekie Braes
by Douglas Fraser
Read by Peter D Wright

Gang your gate in Reekie,

There ye'll find

Bell's Brae, Church Lane

And Castle Wynd.

Fowk wha bide in Reekie

Ken richt weel

There's aye braes, stey braes,

Aye braes to speel.

Pechin up frae Puddocky

Or leavin Leith,

Ere ye win to Princes Street

Ye tine your breith.

Bruntsfield, the Bridges,

High Street as weel,

There's aye braes, stey braes,

Aye braes to speel.

West Bow, Cockburn Street,

A's the same;

Stout herts and strang legs

Are needfu' at the game.

To Himalayan heroes

Reekie micht appeal -

There's aye braes, stey braes,

Aye braes to speel.

But we lesser mortals

Maun e'en dae oor best

And when we're forfochen

Enjoy a bit rest.

For a' pairts o' Reekie

Hae this boon to gie;

There's aye views, braw views,

Aye views to see.