Noo chilly win' are blawin' keen

While winter hauds his ain,

An' spreads his robe o' snawy white

On meadow, hill an' plain;

But by the ingle corner

We sit sae cosily,

Where a sonsie log is bleezin'

Fae the auld gean tree.

 

It grew doon by the kailyaird,

When I wis bit a loon,

An' amang its muckle branches

Aft I spielt an' tummelt doon;

An' the geans were aye far sweeter

Than I've tasted fae sin-syne

An' the memoties o' its blossoms

Roon oor aul' herts twine.

 

It stood the blasts o' winter

Fae lang ere I wis born,

But like a bride in springtime

Wi' blossoms wad adorn.

An' there the Boldie biggit

An' aft the Robin tee

For a' the birds were trystit

In the aul' gean tree.

 

But noo, alas it's vanished

Fae the corner o' the yaird

An' its form is torn asunder

An' the anes who lo'ed hae shared;

Sae when the win's are skirlin'

We sit an' feast oor e'e,

An' toast oor taes sae cosy

At the aul' gean tree.