O for Friday nicht!
Friday - hame and hummin!
O for Friday nicht!
Friday's lang o' comin!
Noo lat's hae Geography!
Fut's the toun for jute?
Sit at peace Jemima!
Kirsty, dry yer snoot!
Hey there, Wullie Wabster!
Stop powkin in yer breist!
Fut? a horny-golloch!
Gweed be here, fut naist!
Faur's the Granite City?
Weel, Georgina Broon?
Glasga? Haud yer weesht, quine!
Glesga's just a toun!
Buckie? Hoots an' havers!
The Broch? Preserve us a'!
Hey there, Geordie Gammie!
Pit that preen awa!
O for Friday nicht!
Friday - hane and hummin"
O for Friday nicht!
Friday's lang o' comin!
Noo lat's hear yer spellin's!
Fut? Ye got nane oot!
A'richt - Nature Study!
Fut gars tatties sproot?
Heat and moisture - fairly!
Fut mair, Wullie Gurk?
Fairmers! Gweed preserve's man!
fairmers dinna work!
Dod, tak' in the bottles!
Fa wants milk the day?
Gweed be here, fut's wrang, Jock?
Needin anither strae?
No! Weel, man, fut gars ye
Stan' there and goup and glower?
Twa deid fleas in ye bottle!
Be thankfu' there's nae fower!
O for Friday nicht!
Friday - hame and hummin!
O for Friday nicht!
Friday's land o' comin!
Fa wid like some singin?
A'richt, sough awa!
'The Smith's a Gallant Fireman'
Or 'Charlie's Noo Awa'.
Sing oot, Susie Simmers!
Rax yer mim-like mou!
Megstie me, Jean Tulloch!
Ye're lowein like a coo!
Noo for Table Mainners!
Specially you, Jock Broon!
Dyod, man, fin ye're suppin,
Sic a slubberin soun'!
And you Bell Bowie Baxter!
As far's ye're mebbe able
Try and haud yer elbucks
And spleeters aff the table!
O for Friday nicht!
Friday - hame and hummin!
O for Friday nicht!
Friday's lang o' comin!
Noo tak' oot yer pencils!
Draw - the Aul' Kirk spire!
Fut's that, Jock? Ye're wantin
Te draw the skweel on fire!
A'richt, fire aheid then!
Gar the biggin bleeze!
Gweed be here, Jean Gordon!
Fut gars ye scratch yer knees?
Dyod, faur's Meggie Mitchell?
Doon aneth her seat?
Tint her sweetie boolie?
Jock, haud in yer feet!
Hing in noo, Jean Calder!
You tee, Muggsie Wugs!
Loshtie me, Bill Boddie!
Fan did ye wash yer lugs?
O for Friday nicht!
Friday - hame and hummin!
O for Friday nicht!
Friday's lang o' comin!
Govie Dick - the Register!
Fa's nae here the day?
Jackie Todd - the nickum!
Granny's washin day!
Jeannie - German measles!
Tammas - twa blin' lumps!
Jamie Tough? Fut's that, Jean?
His mither's takin mumps?
Noo the aucht times table!
Weel dane, Wullie Flett!
Man, ye'll be Director
O' the coonty yet!
Fut's that? No ye wunna!
Weel, weel, please yersel'!
Dyod, it's time for lowsin!
Wullie, ring the bell!
Geordie, shak' the duster!
Jean, pit past the chack!
Fut's that, Wullie Wabster?
A wyver on my back!
Jack, the aspidistra!
Tak' it te the sink!
Canny wi't, ye gommeril!
It's aul'er then ye think!
Noo, a word o' warnin
Afore ye tak' the road!
There's twa Inspectors comin
Haud yer tongue, Jock Todd!
Twa Inspectors comin
Te - fut's adee, Jean Squairs?
Yer mither's mebbe comin?
Wha the deevil cares!
O for Friday nicht!
Friday - hame and hummin!
O for Friday nicht!
It's been gey lang o' comin!
