The deid, thay canna hairm ye
Believe that gin ye will
but the evils o the men lang deid
are leivin wi us still.
Thay booby-trapped wi bigotries
the biggins at thair back
and pushiont the air wi prejudice
ti choke and haud us back.
Laid land mines in thair passin
wi propaganda primed
for generations yit unborn
ti kill or maim or blin.
The springs an waals thay fyllet
til the rivers nae mair rin
and the bonnie fish o wisdom
nae langir loups the linn.
An airmy in retreat
leaves destruction in its' wake
and thaim wha follae on
maun aa the warld remake.
