The Deluge
by W D Cocker
Read by Marilyn Wright

Click here to listen to this in RealAudio

The Lord tuik a staw at mankind,
A richteous an naitural scunner;
They were neither tae haud nor tae bind,
They were frichtet nae mair wi his thunner.

They hid braken ilk edic an law,
They had pitten his saints tae the sword,
They hid worshipped fause idols o stane;
"I will thole it nae mair", saith the Lord.

"I am weary wi flytin at fowk;
I will dicht them clean oot o ma sicht;
But Noah, douce man, I will spare,
For he ettles, pair chiel, tae dae richt."

Sae he cryet untae Noah ae day,
Whan naebody else wis aboot,
Sayin: "Harken, ma servant, tae Me,
An these, ma commands, cairry oot:

"A greit, muckle boat ye maun bigg,
An ark that can float heich an dry,
Wi room in't for aa yer ain fowk
An a hantle o cattle forbye.

"Then tak ye the fowlis o the air,
E'en untae greit bubbleyjocks;
An tak ye the baists o the fields:
Whittrocks, and foumarts, an brocks.

"Wale ye twa guid anes o each,
See that nae cratur rebels;
But dinna ye fash aboot fish:
They kin tak tent o theirsels.

"Herd them aa safely aboard,
An ance the Blue Peter's unfurled,
I'll sen doon a forty-day flood
An deil tak the rest o the warld!"

Sae Noah wrocht hard at the job,
An searched tae the earth's farthest borders,
An gethered the baists an the birds
An tellt them tae staun by for orders.

An his sons, Ham an Japhet an Shem,
Were thrang aa this time at the wark;
They hid fellt a wheen trees in the wid
An biggit a greit muckle ark.

Noo this wisnae juist din on the quaet,
An neebours wid whiles gether roon;
Then Noah wad drap them a hint
Like: "The wather is gaun tae brak doon."

But the neebours wi evil were blin
An little jaloused whit wis wrang,
Sayin: "Oh that will be guid fur the neeps,"
Or: "The wather's been drouthy ower lang."

Then Noah wi aa his ain fowk,
An the baists an the birds gat aboard;
An they steekit the door o the ark,
An they lippened theirsels tae the Lord.

Then doon cam a lashin o rain,
Like the wattest wat day in Lochaber;
The hailstanes like plunkers cam stot,
An the fields turned tae glaur, an syne glabber.

An the burns aa cam doon in a spate,
An the rivers ran clean ower the haughs,
An the brigs were aa soopit awa,
An whit hid been dubs becam lochs.

Then the fowk were sair pitten aboot,
An they cried as the wather goat waur:
"Oh Lord, we ken fine we hae sinn'd
But a joke can be cairried ower faur!"

Then they chapped at the ark's muckle door,
Tae speir gin douce Noah hid room;
But Noah ne'er heedit their cries,
He said: "This'll larn ye tae soom!"

An the river raired loodly an deep;
An the miller wis droont in the mill;
An the watter spread aa ower the land,
An the shepherd wis droont oan the hill.

But Noah an aa his ain fowk,
Kep safe frae the fate o ill men,
Till the ark, when the flood had gien ower,
Cam dunt oan the tap o a ben.

An the watters rowed back tae the seas,
An the seas settled doon an were calm,
An Noah replenished the earth -
But they're sayin he tuik a guid dram!