|
Original lyrics adapted by
John Henderson into the doric and to suit this version of the tune.
CHORUS
She's jist a Kelty clippie, she'll no tak nae advice;
It's, 'Ach drap deid or bile yer heid, Ah'll punch yer ticket twice';
Her faither's jist a waster, her mither's oan the game;
She's jist a Kelty clippie bit Ah love her jist the same.
VERSE 1
Ah've traivelled thru this country frae shore tae shinin shore,
Frae the swamps o' Auchterderran tae the jungles o' Lochore,
But in aa thase far-flung places there's nane thit can compare,
Wi' the 'Lily of Lumphinnans', she's ma bonnie Maggie Blair.
CHORUS
VERSE 2
Frae the pyramids up in Kelty tae the mansions in Glencraig,
We've trod the bings thegither in mony a blythe stravaig;
We've watched the moon ow’r Crosshill, trod Buckha'en's golden sand,
An mony's the happy oor we've spent in Lochgelly's Happy Land.
CHORUS
VERSE 3
Ah remember oan the 8.15, a nicht o' romantic bliss;
Ah says, 'Ho there Mag, nip yer fag, an gie's a wee bit kiss.'
She didnae tak this kindly, naw didnae like ma chaff;
Bein a contrary kind o' bird she said, 'Awa … Come oan, git aff'.
CHORUS
VERSE 4
She hisnae got nae culture, she drives me roon the bend,
Sits doon there in her armchair an reads the People's Friend;
Her lapels are fu o badges frae Butlins doon at Ayr,
Gings tae the bingo ev'ry nicht wi her curlers in her hair.
CHORUS
VERSE 5
Bit things is a wee bit better noo, Ah've goan an got the ring;
Ah wan it frae Jim at pitch an toss, last nicht oan Lindsay Bing;
Wi her wee black hat an tickets, ma hairt she did ensnare;
She's the 'Lily of Lumphinnans', she's ma bonnie Maggie Blair.
FINAL CHORUS |
